У Італіі на беларусаў напала сям'я пацярпелага ў ДТЗ падлетка

У Італіі сям’я 56-гадовага беларуса пасля ДТЗ, у якім пацярпеў 15-гадовы падлетак, зазнала пагрозы і збіццё з боку сваякоў хлопчыка. Пра гэта са словаў мужчыны расказалі мясцовыя СМІ, піша «Беларусь и мир».

Аварыя адбылася 29 сакавіка ў горадзе Рыміні позна ўвечары. Машына, якой кіраваў наш суайчыннік і ў якой знаходзіліся яго жонка і малодшы сын, сутыкнулася з юнаком, што выехаў з завулка на скутары і, як мяркуецца, быў без шлема. У выніку хлопец упаў на асфальт і атрымаў сур’ёзныя траўмы. Яго даставілі ў бальніцу ў рэанімацыйнае аддзяленне і пасля перанесенай аперацыі ўвялі ў штучную кому.

Як расказаў беларус, сутыкненне было раптоўным. Падлетак разбіў галавой акно. Мужчына тут жа спыніўся і, з яго словаў, зрабіў усё магчымае, каб дапамагчы пацярпеламу. У тым ліку тут жа разам з жонкай і сынам (аднагодкам скутарыста) патэлефанаваў у паліцыю, медыкам і ў выратавальныя службы. Але, кажа, зусім не думаў, што прыбылыя вартавыя парадку акажуцца і выратавальнікамі яго ўласнай сям'і.

Наш суайчыннік і няпоўнагадовы жывуць недалёка адзін ад аднаго і ад месца здарэння. Хутка тут сабралася група сваякоў хлопчыка — прадстаўнікоў сінці, адной з заходніх галін народнасці рома. Як кажа мужчына, чалавек пяцьдзясят абступілі яго і яго сям’ю, пачалі пагражаць, а некаторыя потым і збіваць, наносячы ўдары па галаве і нагах. На шчасце, прыбылі праваахоўнікі, і прысутныя разбегліся.

Паводле беларуса, ён, жонка і сын перажылі моцны страх і стрэс. У паліцыі яму параілі, каб пазбегнуць сутыкненняў са сваякамі юнака, на час з’ехаць. Што сям’я і зрабіла дзеля сваёй бяспекі. Пасля збіцця наш суайчыннік з жонкай і сынам звярталіся да медыка. Скаргу падаваць ён не збіраецца, кажучы, што цяпер адзінае, чаго хоча, — каб хутчэй прыйшлі добрыя навіны пра змяненні ў стане хлопчыка.