Сталі вядомыя даходы кандыдатаў у прэзідэнты на выбарах у студзені. Найбольшымі яны аказаліся ў Аляксандра Лукашэнкі. Расказваем, колькі палітык атрымліваў летась у сярэднім за месяц і як яго даходы выраслі з 2019-га.
Якая ў палітыка зарплата чыстымі
Аляксандр Лукашэнка задэклараваў самы высокі гадавы даход за 2023 год сярод усіх кандыдатаў у прэзідэнты — 203 590,16 рубля. Гэта ягоны заробак, а іншых крыніц даходу, мяркуючы з дэкларацыі, у яго няма. У пераліку за адзін месяц атрымліваецца 16 965,85 рубля. Гэта сума чыстымі, то-бок без уліку падаткаў і ўнёскаў.
Нагадаем, у красавіку гэтага года Аляксандр Лукашэнка заявіў, што дактары ў «найлепшых клініках» Беларусі атрымліваюць ад васьмі да дзесяці тысяч рублёў штомесяц, што прыкладна адпавядае «прэзідэнцкай зарплаце».
Чаму ў дэкларацыі палітыка пра даходы за 2023 год няма пенсіі, невядома. Нагадаем, мужчыны ў Беларусі выходзяць на пенсію ў 63 гады, а жанчыны — у 58 гадоў. Аляксандру Лукашэнку ў жніўні 2024-га споўнілася 70 гадоў.
У Аляксандра Лукашэнкі, як гаворыцца ў дэкларацыі, няма ўласнага жылля, транспартных сродкаў і іншай маёмасці.
Як адрозніваюцца заробак Лукашэнкі і сярэдні па краіне
Для параўнання: у тым жа 2023 годзе заробак сярэдняга беларуса быў 1 915,9 рубля, вынікае са звестак Белстата. І гэта «брудны заробак», ад яго трэба адняць 14% (падаходны падатак і сацыяльныя ўнёскі). То-бок на рукі застаецца каля 1648 рублёў.
Выходзіць, што заробак палітыка, якога нярэдка абураюць даходы іншых работнікаў — ад топ-менеджараў у гандлі да спартоўцаў, у 2023 годзе быў больш чым у 10 разоў вышэйшы, чым у сярэднестатыстычнага беларуса.
Яшчэ больш кардынальная розніца, калі параўнаць зарплату палітыка не з сярэдняй, а медыяннай (лічыцца, што яна аб’ектыўней адлюстроўвае сітуацыю з даходамі).
Даведка «Люстэрка». Медыянны заробак паказвае сярэдзіну «зарплатнага шэрагу». Для прыкладу возьмем заробкі ўмоўных пяці работнікаў: 400, 430, 500, 670 і 1200 рублёў. Сярэдні заробак у такім выпадку будзе 640, а медыянны — 500 рублёў, бо палова работнікаў зарабляе больш за гэтую суму, другая палова — менш. То-бок медыянны заробак значыць, што 50% работнікаў атрымліваюць менш за гэтае значэнне, а 50% работнікаў — больш.
У лістападзе 2023 года медыянны заробак у цэлым па краіне складаў 1 499,5 рубля, пасля выліку падаткаў — каля 1290 рублёў. Столькі ці менш зарабляла палова беларусаў, што працуюць, у краіне. За год атрымліваецца каля 15 480 рублёў. То-бок Аляксандр Лукашэнка за месяц меў больш, чым палова беларусаў зарабляе за год.
На колькі вырас заробак палітыка за пяць гадоў, а на колькі — сярэдні па краіне
Падчас мінулай прэзідэнцкай кампаніі Аляксандр Лукашэнка таксама падаваў дэкларацыю — за 2019 год. Тады яго гадавы даход быў 117 068 рублёў. Гэта 9 755,67 рубля за месяц. Выходзіць, што за пяць гадоў яго заробак вырас у 1,7 разу (калі дакладней, то павелічэнне на 73,9%).
У той жа 2019 год у сярэднім беларусы зараблялі 1 092,9 рубля, або 939,89 рубля на рукі. То-бок да 2023-га яна вырасла амаль у 1,8 разу (калі дакладней, то павелічэнне на 75,3%).
Выходзіць, што заробак Аляксандра Лукашэнкі ў 2019-м быў у 10,4 разу большы, чым сярэдні па краіне.
Як Лукашэнка змагаўся за «справядлівыя» заробкі — на прыкладзе гандлю
Нагадаем, акурат у 2023 годзе палітык абураўся высокімі заробкамі топ-менеджараў у буйных прыватных гандлёвых кампаніях. Тады ж ён патрабаваў, каб суадносіны заробкаў работнікаў і кіраўнікоў, уладальнікаў гандлёвай арганізацыі былі ў межах 1 да 8.
«Яны што, працуюць больш, чым прадавец? — задаваўся тады пытаннем Аляксандр Лукашэнка. — Урад і аблвыканкамы выпрацавалі шэраг прапановаў, каб такога надалей не было. Вось мы і паслухаем гэтыя прапановы. Падставаў для разваг больш чым дастаткова. Не хацелася б, каб вы мне пра „гераізм“ расказвалі. Нам трэба бачыць недахопы і прыняць дадатковыя меры (гэта вам давядзецца дапаўняць, але я хачу іх пачуць) для таго, каб гэтай брыдоты не было».
Раней, у кастрычніку 2022 года, Аляксандр Лукашэнка таксама падымаў пытанне заробкаў у гандлі. «Дзе гэтая справядлівасць?» — задаваўся ён пытаннем, параўноўваючы заробкі топ-менеджараў рытэйлу і прадаўцоў.
Чытайце таксама
