Камітэт Сейма Літвы па нацыянальнай бяспецы і абароне падтрымлівае ўвядзенне больш строгіх нацыянальных санкцый у дачыненні да грамадзян Беларусі і Расіі, піша LRT.
У чацвер, 3 красавіка, чальцы камітэта аднагалосна падтрымалі прапанову кансерватараў Лаўрынаса Кашчунаса, Аўдронюса Ажубаліса і Валдаса Ракуціса пра тое, што выдачу відаў на жыхарства ў Літве грамадзянам Беларусі, як і расіянам, варта прыпыніць, калі ў іх няма дзейнай візы. А дзейныя віды на жыхарства мусяць быць ануляваныя, калі грамадзяне Расіі і Беларусі здзейснілі паездкі на радзіму больш за адзін раз цягам трох каляндарных месяцаў.
Выключэнне зробяць да перавозчыкаў і кіроўцаў грузавікоў, якія ідуць транзітам праз Беларусь і Расію, або калі паездка мела аб’ектыўныя прычыны, якія не залежаць ад грамадзяніна.
На паседжанні камітэта гэтыя прапановы падтрымалі прадстаўнікі прэзідэнцкага ведамства і Дэпартамента дзяржаўнай бяспекі (ДДБ), але іх раскрытыкавалі бізнес-арганізацыі.