У базе праваабарончага цэнтра «Вясна» няма звестак пра адміністрацыйны пераслед зніклай спікеркі Каардынацыйнай рады Анжалікі Мельнікавай, піша Deutsche Welle.
Праваабаронцы расказалі, што ў іх базе адміністрацыйнага пераследу, у якой сабраныя ўсе вядомыя праваабаронцам выпадкі затрыманняў і адміністрацыйных працэсаў з пачатку выбарчай кампаніі 2020 года, звестак пра Мельнікаву няма.
«Інфармацыі пра затрыманні ці суды Анжалікі Мельнікавай у нашай базе няма», — заявілі праваабаронцы. Ад іншых каментароў у «Вясне» ўстрымаліся «да з’яўлення афіцыйнай інфармацыі пра лёс Мельнікавай».
У інтэрв'ю выданню «Салідарнасць» у лістападзе 2020 года Анжаліка расказвала, што яе «двойчы затрымлівалі і судзілі па славутым артыкуле 23.34 — за заклік да ўдзелу ў „Маршы свабоды“ і „арганізацыю несанкцыянаванага мерапрыемства“ — велапрабегу з бел-чырвона-белымі сцягамі, плакатамі і лозунгамі „Нясвіж супраць гвалту“».
Як маме няпоўнагадовых дзяцей ёй далі не «суткі», а штрафы агульнай сумай 60 базавых велічынь. Іх беларуска пагасіла з дапамогай ініцыятывы BY_help, пісала «Салідарнасць». Са словаў Мельнікавай, з Беларусі яна вырашыла з’ехаць, баючыся крымінальнага пераследу.
— Гэта цяпер, калі прайшоў нейкі час, я магу пажартаваць: не сядзеў — не беларус, а тады, вядома, было страшна, — працягвае Анжаліка. — Да таго ж нам сказалі, што раз і ў мяне, і ў мужа ёсць адміністрацыйныя правапарушэнні, то могуць забраць дзяцей, не паглядзеўшы на пажылую бабулю.
Нагадаем, спікерка Каардынацыйнай рады Анжаліка Мельнікава знікла 25 сакавіка. Павел Латушка заявіў, што афіцыйна паведаміў у праваахоўныя органы Польшчы пра яе знікненне. На просьбу праваахоўных органаў гэтая інфармацыя раней не публікавалася. Разам з жанчынай зніклі і яе дочкі 6 і 12 гадоў, якія жылі з ёю ў Варшаве.
Днём 31 сакавіка Павел Латушка заявіў, што мабільны тэлефон Анжалікі Мельнікавай з 19 сакавіка знаходзіцца на тэрыторыі Беларусі. Паводле яго, «гэта выявілі тэхнічным спосабам».
Чытайце таксама
