Сіноптыкі папярэдзілі пра небяспеку ў чацвер

На чацвер, 10 красавіка, абвешчаны аранжавы ўзровень небяспекі праз непагадзь. Адпаведнае папярэджанне апублікаваў Белгідрамет.

10 красавіка ў многіх раёнах краіны і ў Мінску чакаецца ўзмацненне паўночна-заходняга ветру. Парывы будуць дасягаць 15−20 м/с.

У чацвер будзе воблачна з праясненнямі. Часам магчымыя ападкі: снег, мокры снег, дождж. Месцамі па ўсходзе краіны чакаюцца моцны снег і завіруха.

Днём на большай частцы тэрыторыі краіны пройдзе кароткачасовы снег, мокры снег. На асобных участках дарог галалёдзіца, ноччу месцамі слабы галалёд.

Тэмпература паветра мінімальная ноччу −1…−6°С, максімальная днём −1…+5°С.

Рэкамендацыі МНС на выпадак моцнага ветру:

• прыбярыце гаспадарчыя рэчы з двара і балконаў у дом (падвал), абрэжце сухія дрэвы, якія могуць нанесці шкоду вашаму жыллю;
• машыну пастаўце ў гараж, калі гаража няма, машыну варта паркаваць удалечыні ад дрэваў, а таксама слаба ўмацаваных канструкцый;
• знаходзячыся на дварэ, абыходзьце хісткія будынкі і дамы з няўстойлівым дахам;
• унікайце дрэваў і разнастайных збудаванняў павышанай рызыкі (мастоў, эстакад, трубаправодаў, ліній электраперадачы, патэнцыйна небяспечных прамысловых аб’ектаў).