У Індыі ўпраўленне па кантролі за бяспекай прадуктаў харчавання і захаванні стандартаў (FSSAI) абвясціла пра пачатак праверкі ўсіх вытворцаў прыправаў у краіне, паведаміла агенцтва Reuters у чацвер, 2 траўня. Гэта выкліканае тым, што ў прадукцыі двух найбуйнейшых вытворцаў прыправаў MDH і Everest, якія пастаўляюць свае сумесі на рынкі многіх краін, знайшлі аксід этылену — моцны яд з канцэрагенным, мутагенным і наркатычным дзеяннем, піша Deutsche Welle.
Першыя паведамленні пра тое, што ў сумесях індыйскіх прыправаў, магчыма, утрымліваецца аксід этылену, паступілі ў пачатку красавіка з Ганконга і Сінгапура. Высокае ўтрыманне таксічнага рэчыва выявілі, у прыватнасці, у папулярных сумесях кары і гарам масала. Пасля гэтага ў Ганконгу і Сінгапуры гэтыя прыправы былі адкліканыя з продажу. У канцы красавіка праверкі індыйскіх прыправаў пачаліся ў Аўстраліі і Новай Зеландыі. Збор інфармацыі вядуць і амерыканскія рэгулятары.
Маштабныя праверкі ў Індыі
Пасля паведамленняў з Ганконга і Сінгапура індыйскае ўпраўленне FSSAI пачало праверку вытворчых аб’ектаў MDH і Everest. Цяпер жа ведамства правядзе маштабныя праверкі, зняцце пробаў і тэставанне на ўсіх вытворчых аб’ектах усіх кампаній, якія вырабляюць прыправы і спецыі.
«Кожны прадукт будзе прааналізаваны на адпаведнасць стандартам якасці і бяспекі», — падкрэслілі ў FSSAI.
Індыя — найбуйнейшы ў свеце вытворца, спажывец і экспарцёр прыправаў. Аб’ём індыйскага рынку прыправаў, паводле ацэнак Zion Market Research, набліжаецца да 10,5 млрд даляраў.