Украінскія вайскоўцы паведамілі, што за суткі адбілі некалькі атак расійскіх войскаў на розных напрамках. У Мінабароны РФ заявілі, што ўначы нанеслі групавы ўдар высокадакладнай зброяй па базе падрыхтоўкі дыверсійных груп УСУ. Аналітыкі Інстытута па вывучэнні вайны адзначаюць, што ўкраінскія вайскоўцы працягваюць прасоўвацца на захадзе Запарожскай вобласці. Пераказваем галоўнае са зводак штабоў і высноваў экспертаў на 600-ы дзень вайны.
Генштаб УСУ: Адбітыя атакі расійскіх войскаў і наступальная аперацыя на Мелітопальскім напрамку
«Вораг працягвае забіваць мірных жыхароў Украіны і ігнараваць законы і звычаі вайны, выкарыстоўвае тактыку тэрору, абстрэльвае як вайсковыя, так і цывільныя аб’екты. За суткі расійскія войскі нанеслі 40 авіяцыйных удараў, здзейснілі 51 абстрэл з рэактыўных сістэм залпавага агню па пазіцыях УСУ і населеных пунктах. У выніку расійскіх тэрарыстычных атак ёсць загінулыя і параненыя сярод цывільнага насельніцтва. Разбурэнням падвергліся жылыя дамы і іншая цывільная інфраструктура», — расказалі ў Генштабе УСУ.
Паводле звестак украінскіх вайскоўцаў, за мінулыя суткі адбылося 28 баявых сутыкненняў.
- На Валынскім і Палескім напрамках аператыўная абстаноўка без істотных змен.
- На Северскім і Слабажанскім напрамках праціўнік нанёс авіяцыйныя ўдары ў раёнах Сідараўкі Сумскай вобласці і Ветэрынарнага Харкаўскай вобласці. Абстраляў з мінамётаў і артылерыі больш за 25 населеных пунктаў.
- На Купянскім напрамку УСУ адбілі атакі праціўніка ў раёне Навасёлаўскага Луганскай вобласці. Вораг працягвае абстрэльваць з артылерыі і мінамётаў населеныя пункты.
- На Ліманскім напрамку УСУ адбілі атакі праціўніка ў раёне Новаягораўкі Луганскай вобласці. Вораг нанёс авіяцыйныя ўдары ў раёнах Белагораўкі Луганскай вобласці, Тарскога, Северска, Спірнога Данецкай вобласці. Праціўнік працягвае наносіць артылерыйскія і мінамётныя ўдары па населеных пунктах.
- На Бахмуцкім напрамку УСУ адбілі атакі праціўніка ў раёнах Залізнянскага, Кляшчэеўкі, Белай Гары Данецкай вобласці. Вораг нанёс авіяцыйны ўдар у раёне Кляшчэеўкі Данецкай вобласці. Артылерыйскім абстрэлам праціўніка падвергліся больш чым 20 населеных пунктаў.
- На Аўдзееўскім напрамку праціўнік нанёс авіяцыйны ўдар у раёне Аўдзееўкі Данецкай вобласці. Варожым артылерыйскім абстрэлам падвергліся больш чым 10 населеных пунктаў.
- На Мар'інскім напрамку УСУ працягваюць стрымліваць наступ расійскіх войскаў у раёне Мар'інкі. Праціўнік нанёс авіяцыйны ўдар ля Краснагораўкі. Артылерыйскім абстрэлам падвергліся некалькі населеных пунктаў.
- На Шахцёрскім напрамку праціўнік нанёс авіяцыйныя ўдары ў раёнах Вуглядара і Старамаёрскага. Артылерыйскім абстрэлам падвергліся больш чым 10 населеных пунктаў.
- На Запарожскім напрамку УСУ адбілі атакі праціўніка ў раёне Рабоціна Запарожскай вобласці. Праціўнік нанёс авіяцыйныя ўдары ў раёнах Малой Такмачкі, Рабоціна, Арэхава Запарожскай вобласці. Артылерыйскім абстрэлам праціўніка падвергліся больш чым 15 населеных пунктаў.
- На Херсонскім напрамку вораг нанёс авіяцыйны ўдар у раёне Міхайлаўкі Херсонскай вобласці. Артылерыйскім абстрэлам падвергліся больш чым 15 населеных пунктаў.
«УСУ працягваюць вядзенне наступальнай аперацыі на Мелітопальскім напрамку, замацоўваюцца на дасягнутых рубяжах, ажыццяўляюць мерапрыемствы контрбатарэйнай барацьбы», — адзначылі ў Генштабе.
Падраздзяленні ракетных войскаў і артылерыі за мінулыя суткі пабілі адзін раён канцэнтрацыі асабовага складу, узбраення і ваеннай тэхнікі, 14 артылерыйскіх сродкаў на агнявых пазіцыях, 1 склад боепрыпасаў і 1 зенітна-ракетны комплекс праціўніка. Украінская авіяцыя нанесла 11 удараў па раёнах канцэнтрацыі асабовага складу і два — па зенітна-ракетных комплексах праціўніка.
Мінабароны РФ: Нанеслі групавы ўдар высокадакладнай зброяй па базе падрыхтоўкі дыверсійных груп УСУ
«Уначы ВКС Расіі нанеслі групавы ўдар высокадакладнай зброяй вялікай далёкасці па базе падрыхтоўкі дыверсійных груп УСУ. Аб’ект пабіты. Мэта ўдару дасягнутая», — заявілі ў Мінабароны Расіі.
— На Данецкім напрамку падраздзяленні Паўднёвай групоўкі войскаў ва ўзаемадзеянні з авіяцыяй і артылерыяй адбілі дзесяць атак штурмавых груп 80-й дэсантна-штурмавой, 110-й механізаванай і 59-й мотапяхотнай брыгад УСУ ў раёнах населеных пунктаў Кляшчэеўка, Арэхава-Васілеўка, Хімік, Невельскае і Мар'інка Данецкай вобласці. Акрамя таго, у раёне Арцёмаўска нанесенае агнявое паражэнне жывой сіле і тэхніцы 17-й танкавай брыгады УСУ. Падчас баёў на гэтым напрамку праціўнік страціў да 285 вайскоўцаў, танк, дзве баявыя машыны пяхоты, пяць аўтамабіляў, самаходную артылерыйскую ўстаноўку «Гваздзік», гармату «Рапіра», а таксама пункт кіравання беспілотнымі лётнымі апаратамі.
— На Паўднёва-Данецкім напрамку падраздзяленнямі групоўкі войскаў «Усход» пры падтрымцы авіяцыі і артылерыі адбітая атака штурмавога атрада 38-й механізаванай брыгады УСУ ў раёне населенага пункта Новаданецкае Данецкай вобласці. Акрамя таго, нанесенае паражэнне жывой сіле і ваеннай тэхніцы праціўніка ў раёнах населеных пунктаў Ураджайнае і Новаданецкае Данецкай вобласці. Страты праціўніка на гэтым напрамку склалі звыш 180 вайскоўцаў, пяць танкаў, дзве баявыя браніраваныя машыны, два аўтамабілі, самаходная артылерыйская ўстаноўка Krab польскай вытворчасці, дзве самаходныя гаўбіцы «Гваздзік», а таксама гармата Д-20.
— На Запарожскім напрамку падраздзяленні расійскай групоўкі войскаў пры падтрымцы авіяцыі, артылерыі і цяжкіх агнямётных сістэм адбілі чатыры атакі праціўніка ў раёнах населеных пунктаў Вербавае і Рабоціна Запарожскай вобласці. Зменаў у тактычным становішчы расійскіх войскаў няма. За суткі забітыя да 40 украінскіх вайскоўцаў, знішчаныя танк, дзве баявыя браніраваныя машыны, два пікапы, дзве артылерыйскія сістэмы М777 вытворчасці ЗША, тры самаходныя артылерыйскія ўстаноўкі М109 Paladin, гармата FH-70 вытворчасці Вялікабрытаніі, дзве гаўбіцы «Мста-Б», дзве гарматы Д-30 і дзве самаходныя артылерыйскія ўстаноўкі «Гваздзік».
— На Купянскім напрамку падраздзяленні Заходняй групоўкі войскаў пры падтрымцы авіяцыі і артылерыі вядзеннем актыўнай абароны палепшылі тактычнае становішча ў раёне населенага пункта Свярдлоўка Луганскай вобласці. Акрамя таго, у раёне населенага пункта Сяргееўка Луганскай вобласці адбітыя дзве контратакі штурмавых груп 95-й дэсантна-штурмавой брыгады УСУ. За суткі страты праціўніка склалі да 40 вайскоўцаў, два аўтамабілі, самаходная артылерыйская ўстаноўка М109 Paladin, а таксама гаўбіца Д-30.
— На Чырвоналіманскім напрамку пісьменнымі дзеяннямі падраздзяленняў групоўкі войскаў «Цэнтр» ва ўзаемадзеянні з авіяцыяй і артылерыяй адбітыя дзве атакі штурмавых груп 12-й брыгады спецыяльнага прызначэння і 63-й механізаванай брыгады УСУ ў раёнах населенага пункта Чырвоная Дзіброва Луганскай вобласці і Серабранскага лясніцтва. Забітыя да 50 украінскіх вайскоўцаў, знішчаныя дзве баявыя браніраваныя машыны, самаходная артылерыйская ўстаноўка «Гваздзік» і гаўбіца Д-30.
— На Херсонскім напрамку ў выніку ўдараў авіяцыі і агню расійскай артылерыі страты праціўніка склалі да 65 вайскоўцаў, чатыры аўтамабілі і гаўбіца «Мста-Б».
Сродкамі супрацьпаветранай абароны за суткі перахопленыя 12 рэактыўных снарадаў сістэм залпавага агню HIMARS і «Ураган». Акрамя таго, знішчаныя і задушаныя сродкамі радыёэлектроннай барацьбы 17 украінскіх беспілотных лётных апаратаў у раёнах населеных пунктаў Макееўка, Нованікольскае, Мелаватка самаабвешчанай Луганскай Народнай Рэспублікі, Бераставое саамаабвешчанай Данецкай Народнай Рэспублікі, Пшанічнае, Сямёнаўка Запарожскай вобласці, Альшана Харкаўскай вобласці і Крынкі Херсонскай вобласці.
У Мінабароны Расіі таксама расказалі пра ўдары па тэрыторыі Украіны за суткі:
- аператыўна-тактычная авіяцыя, ракетныя войскі і артылерыя пабілі жывую сілу і ваенную тэхніку ў 103 раёнах.
- сродкі супрацьпаветранай абароны перахапілі 12 рэактыўных снарадаў сістэм залпавага агню HIMARS і «Ураган». Акрамя таго, знішчаныя і задушаныя сродкамі радыёэлектроннай барацьбы 17 украінскіх беспілотных лётных апаратаў.
Інстытут па вывучэнні вайны (ISW): УСУ працягваюць прасоўвацца на захадзе Запарожскай вобласці
Украінскія войскі працягваюць наступ на захадзе Запарожскай вобласці, пішуць аналітыкі амерыканскага Інстытута па вывучэнні вайны (ISW).
На кадрах з геапрывязкай, апублікаваных 5 верасня, відаць, як расійскія войскі наносяць удары па ўкраінскіх пазіцыях на паўночны захад і захад ад вёскі Рабоціна, што паказвае на прасоўванне УСУ ў раёне населенага пункта, які, як раней сцвярджалася, кантралюецца расійскімі сіламі.
Дадатковыя кадры з геалакацыяй сведчаць, што ўкраінскія сілы таксама прасунуліся на поўдзень ад Рабоціна і на паўночны захад ад вёскі Вербавае. Геададзеныя дазваляюць дапусціць, што УСУ прасоўваюцца ўздоўж лініі расійскіх умацаванняў.
Украінскія вайсковыя крыніцы таксама пацвердзілі, што УСУ дамагліся поспехаў на кірунку Рабоціна — Новапракопаўка на поўдзень ад Арэхава.
Ключавыя высновы ISW:
- расійскія крыніцы працягваюць скардзіцца на тое, што арміі не хапае дастатковых контрбатарэйных магчымасцяў і артылерыйскіх боепрыпасаў перад тварам украінскай контрнаступальнай аперацыі, якая працягваецца;
- украінскія контрнаступальныя аперацыі ў памежным раёне Данецкай і Запарожскай вобласці, хутчэй за ўсё, дазволяць скаваць часткі 7-й гвардзейскай горна-дэсантнай дывізіі (ПДВ) і не дапусціць іх перакідвання на крытычныя ўчасткі фронту на захадзе Запарожскай вобласці;
- расійскія войскі 5 верасня вялі наступальныя аперацыі на лініі Купянск — Сватава — Крамянная, у раёне Бахмута, на лініі Аўдзееўка — Данецк, на захадзе Данецкай і ўсходняй мяжы Запарожскай вобласці, а таксама на захадзе Запарожскай вобласці і прасунуліся на асобных участках;
- 5 верасня ўкраінскія войскі правялі наступальныя аперацыі як мінімум на двух участках фронту і прасунуліся ў раёне Бахмута, на захадзе Данецкай і ўсходняй мяжы Запарожскай вобласці, а таксама на захадзе Запарожскай вобласці.
Ва ўмовах ваенных дзеянняў мы не можам аператыўна праверыць дакладнасць звестак афіцыйных асобаў пра канфлікт. Любыя паведамленні праціўнікаў пра свае і чужыя страты варта ўспрымаць з пэўнай доляй скепсісу.