Дызайн новага нацыянальнага пашпарта Беларусі прэзентаваў прадстаўнік Аб’яднанага пераходнага кабінета (АПК) па міжнародных справах Валерый Кавалеўскі на канферэнцыі «Новая Беларусь 2023».
Спікер адзначыў, што геральдычная камісія ўжо распрацавала ўзор дакумента. Ён будзе насычаны беларускімі нацыянальнымі сімваламі.
У пашпарце выкарыстоўваюцца дзве мовы: беларуская і англійская. На старонках размешчаныя нацыянальныя сімвалы, помнікі архітэктуры і культуры. Акрамя таго, дакумент змяшчае герб «Пагоня» і гімн БНР «Мы выйдзем шчыльнымі радамі».
Пашпарт будзе біяметрычным машынапісным дакументам, які адпавядае ўсім патрабаванням Міжнароднай арганізацыі грамадзянскай авіяцыі. Бяспека дадзеных будзе ажыццяўляцца ў строгай адпаведнасці з заканадаўствам ЕС, запэўнілі ў АПК.
«Пашпарт — не замена для нацыянальных віз, не дазвол на пражыванне і працаўладкаванне ў краінах ЕС. Працэс легалізацыі ў дзяржаве, якая прызнала пашпарт, перастане быць праблемай у выпадках непрыдатнасці або страты старога пашпарта», — паведамілі ў АПК.
Цяпер размяшчаецца заказ на закупку матэрыялаў для вытворчасці фізічных узораў дакумента, ствараецца юрыдычная асоба для суправаджэння праекта.
Раней прадстаўнікі АПК правялі перамовы і кансультацыі з кіраўніцтвам Еўракамісіі і шэрагам нацыянальных урадаў, эскіз пашпарта быў прадстаўлены Камітэту па праязных дакументах Еўракамісіі.
«Надышоў этап вырабу фізічных узораў пашпарта — абавязковая ўмова для яго прызнання. Чакаецца, што вытворчасць узораў зойме некалькі месяцаў. Для станоўчага рашэння аб прызнанні Кабінет будзе праводзіць перамовы з урадамі. Важна, каб беларусы падтрымалі праект праз звароты да афіцыйных асоб, палітыкаў, экспертаў, праз медыя і грамадзянскія арганізацыі», — паведамілі ў АПК.
Плануецца, што дакумент будзе выдавацца Аб’яднаным пераходным кабінетам праз сетку пашпартных цэнтраў.
Заяўкі на атрыманне дакумента будуць прымацца сеткай офісаў, размешчаных у краінах з найбольшай колькасцю беларусаў замежжа. Разглядаецца таксама магчымасць арганізацыі мабільных цэнтраў, якія змогуць выязджаць у іншыя краіны для прыняцця зваротаў.
Працэс збору неабходных звестак будзе ўяўляць сабой стандартную працэдуру дакументавання (запаўненне формы заяўкі, фатаграфаванне, збор біяметрычных дадзеных).
Выдача гатовага дакумента будзе ажыццяўляцца тамсама, дзе падавалася заяўка, або па пошце (пры магчымасці). Пашпарты грамадзяніна Беларусі ўзору 1996 года і біяметрычныя пашпарты ўзору 2021 года забірацца не будуць, каб беларусы мелі магчымасць ездзіць па гэтых дакументах у Беларусь.
На першым этапе АПК сканцэнтруецца на прызнанні пашпарта краінамі — чальцамі ЕС і краінамі з найбольшай колькасцю беларусаў, потым — на пытаннях бязвізавага рэжыму для ўладальнікаў пашпартоў новай Беларусі.
Каб вывучыць попыт на новыя пашпарты, платформа «Голас» запусціла апытанне ад АПК. Прайсці яго можна па спасылцы.